Azərbaycanlı TIR sürücüləri Gürcüstan gömrük məntəqələrində günlərlə saxlanılır

Gürcüstan ərazisindən tranzit keçən bir qrup Azərbaycan yük maşını sürücüsü gömrük məntəqələrində günlərlə saxlanıldıqlarını və saxlanılmalarının səbəbi barədə rəsmi izahat verilmədiyini bildirir. Sürücülər əsasən "Sarp" və "Qırmızı Körpü" sərhəd-keçid məntəqələrində, eləcə də Tbilisidəki Gömrük Rəsmiləşdirilməsi Mərkəzində uzun müddətdir gözlədiklərini deyirlər.

Sürücü Teymur Sultanov bildirib ki, Batumiyə qədər hərəkət zamanı heç bir problemlə üzləşməyib, lakin "Sarp" məntəqəsində avtomobili saxlanılıb, pasportu, sürücülük vəsiqəsi və digər sənədləri götürülüb. O, artıq 15 gündür gömrük ərazisində olduğunu və yalnız "gözləyin" cavabı aldığını, sənədlərdə, yükdə və ya çəkidə hansı problemin olduğunu heç kimin izah etmədiyini qeyd edib.

Digər sürücü Eldəniz Məmmədliyev isə bir aydan çoxdur Gürcüstanda qaldığını deyir. Kutaisidə istehsal olunan və dəmir sənayesində istifadə edilən kimyəvi maddəni Azərbaycana apararkən əvvəlcə gömrükdə üç gün saxlanılıb, sonra başqa məntəqəyə aparılıb. Onun sözlərinə görə, maşını tamamilə sökülüb, bütün sənədləri, pasportu və telefonu alınıb, sonra heç bir izahat verilmədən "gedə bilərsən" deyilib. Pasportu yalnız 20 gündən sonra qaytarılıb, bu müddətdə avtomobil sökülmüş vəziyyətdə qalıb və özü küçədə gecələməli olub.

Sürücülər Bəhadur Əliyev və İman Əliyev də Batumidə gömrük rəsmiləşdirilməsi prosesinin uzanması səbəbindən günlərlə gözlədiklərini bildirirlər. "Qırmızı Körpü" məntəqəsində saxlanılan sürücülərə gömrük əməkdaşları Gürcüstanın Ətraf Mühitin Mühafizəsi və Kənd Təsərrüfatı Nazirliyinin xüsusi icazə sənədini tələb ediblər. Sənəd təqdim olunsa da, sonradan onun gürcü dilinə tərcüməsi istənilib. Yük sahibi Sahib Əliyev bildirib ki, həmin icazə sənədi 2023-cü ildə verilib və indiyədək eyni sənədlərlə yüzlərlə yük avtomobili maneəsiz keçib.

Sürücülər gömrük əməkdaşlarının kobud davranışından da şikayətlənirlər. Onların sözlərinə görə, sual ünvanladıqda bəzi əməkdaşlar "Get, gözlə" cavabı ilə kifayətlənirlər. Məsələ ilə bağlı Azərbaycanın Gürcüstandakı Səfirliyi hadisəni nəzarətə götürdüyünü, Gürcüstan Xarici İşlər Nazirliyinə diplomatik sorğu ünvanlandığını və məsələnin aidiyyəti dövlət qurumları ilə birlikdə araşdırıldığını bildirib.