Azərbaycanda analıq və atalıq məzuniyyətləri: 126 gün ödənişli məzuniyyət hüququ

Azərbaycanda işləyən qadınlara hamiləlik və doğuşla əlaqədar ümumilikdə 126 təqvim günü müddətində ödənişli məzuniyyət verilir. Bu barədə Əmək və Əhalinin Sosial Müdafiəsi Nazirliyi (ƏƏSMN) məlumat yayıb. Məzuniyyət doğuşdan əvvəl 70 təqvim günü və doğuşdan sonra 56 təqvim günü olmaqla bölünür.

Nazirliyin məlumatına görə, doğuşdan əvvəlki məzuniyyət müddəti gözlənilən doğuş tarixindən uşağın dünyaya gəldiyi günə qədər keçən günlər qədər uzadıla bilər. Bu halda doğuşdan sonrakı məzuniyyət müddəti azaldılmır. Həmçinin, iki aylığadək uşağı övladlığa götürən qadınlar da doğuşdan sonrakı 56 günlük ödənişli sosial məzuniyyətdən yararlana bilərlər.

Uşağın doğulması ilə əlaqədar kişilərə tibb müəssisəsinin təqdim etdiyi arayış əsasında ümumilikdə 14 təqvim günü müddətində ödənişli məzuniyyət verilir. Bu məzuniyyət doğuşdan əvvəl və doğuşdan sonrakı dövrü əhatə edə bilər.

Qeyd olunub ki, uşağa bilavasitə qulluq edən valideynlərdən biri və ya uşağı övladlığa götürən şəxs, eləcə də ailənin digər üzvü uşağın üç yaşı tamam olanadək ona qulluq etmək üçün qismən ödənişli sosial məzuniyyət hüququna malikdir. Bu müddətdə qanunvericiliklə müəyyən edilmiş qaydada müavinət ödənilir.