Avqustun 4-də bir sıra ərazilərdə elektrik enerjisinin verilişində məhdudiyyət olacaq

"Azərişıq" ASC avqustun 4-də elektrik enerjisinin verilişində keyfiyyət göstəricilərinin artırılması və artan yük tələbatının qarşılanması məqsədilə planlı təmir işlərinin aparılacağını açıqlayıb. Bu çərçivədə Bakıda Transformator Məntəqəsində (TM) təmir-təftiş işləri, eləcə də bir sıra rayonlarda müxtəlif gərginlikli hava elektrik verilişi xətlərində təmir və ağac budanması işləri həyata keçiriləcək.

Yasamal Rayon Enerji Təchizatı və Satışı İdarəsinin (RETSİ) xidməti ərazisində Nəriman Nərimanov, Əli bəy Hüseynzadə, Abdulla Şaiq, Zülfüqar Adıgözəlov, Cabbar Qaryağdıoğlu, Salatın Əsgərova və Murtuza Muxtarov küçələrinin bir hissəsində saat 10:00-dan 13:00-dək elektrik enerjisinin verilişində məhdudiyyət tətbiq olunacaq.

Göyçay Elektrik Şəbəkəsinə (EŞ) daxil olan Qaraməryəm, Şahsoltanlı və Yekəxana kəndlərində saat 09:00-dan 12:00-dək, şəhər ərazisində Məhəmmədhüseyn Şəhriyar, Məhəmməd Əmin Rəsulzadə və Nizami küçələrində isə saat 10:00-dan 15:00-dək fasilə planlaşdırılır. Həmçinin rayonun Cəyirli, Çayarxı, Hacalıkənd, Qarabaqqal və Türkman kəndlərində də bu müddət ərzində enerji verilişi dayandırılacaq.

Mingeçevir EŞ-nin ərazisində Təbriz, Yaşar Muradov, Koroğlu və Züleyxa Həsənova küçələrində saat 09:00-dan 13:00-dək, Tərtər EŞ-nin ərazisində isə 10 kV-luq 3 saylı "Xoruzlu" hava xəttindən qidalanan yaşayış məntəqələrində saat 10:00-dan 12:00-dək gərginlik olmayacaq.

Görülən işlər yekunlaşdıqdan sonra adıçəkilən ərazilərdə abonentlərin daha keyfiyyətli və dayanıqlı elektrik enerjisi ilə təmin olunacağı bildirilir.