Vaşinqton ştatında meşə yanğınları: ən yüksək təxliyə səviyyəsi elan edilib

ABŞ-ın Vaşinqton ştatının Spokane dairəsində baş verən meşə yanğınları ilə əlaqədar bir neçə yaşayış məntəqəsində ən yüksək – üçüncü səviyyəli təxliyə elan edilib. Yerli hakimiyyət orqanları sakinləri təhlükə səbəbindən yaşadıqları əraziləri dərhal tərk etməyə çağırıb.

"Old Trails Fire" adlandırılan yanğın sürətlə yayılaraq artıq 930 hektar (təxminən 2,3 min akr) ərazini əhatə edib. Yanğının genişlənməsi davam etdiyi üçün təhlükə altında olan rayonların sakinlərinə evlərini tərk etmək tövsiyə olunub.

Hazırda Vaşinqton ştatında ümumi sahəsi təxminən 81 min hektar olan 12 iri meşə yanğını qeydə alınıb. Yanğınlarla mübarizəyə əlavə qüvvə kimi Milli Qvardiyanın 110 hərbçisi cəlb edilib.

Təbii fəlakət fonunda ştatda 52 mindən çox abonent elektrik enerjisiz qalıb. Bu barədə "poweroutage.us" portalı məlumat yayıb. Elektrik kəsintiləri yanğınlarla mübarizə işlərini daha da çətinləşdirir.