Avqustun 3-də hava və çimərlik proqnozu açıqlanıb

Milli Hidrometeorologiya Xidməti avqustun 3-nə olan hava proqnozunu açıqlayıb. Bakıda və Abşeron yarımadasında havanın yağmursuz keçəcəyi gözlənilir. Gecə temperatur 22-25 dərəcə, gündüz isə 30-35 dərəcə isti olacaq. Külək əsasən mülayim şimal-qərb istiqamətində əsəcək, gündüz isə şimal-şərq küləyi ilə əvəz olunacaq.

Atmosfer təzyiqi 761 mm civə sütunu, nisbi rütubət isə gecə 70-75 faiz, gündüz 45-50 faiz təşkil edəcək. Azərbaycanın rayonlarında da havanın əsasən yağmursuz keçəcəyi gözlənilir, lakin gündüz bəzi dağlıq ərazilərdə qısamüddətli yağış və şimşək çaxması ehtimalı var. Gecə və səhər dağlıq ərazilərdə duman müşahidə oluna bilər.

Rayonlarda havanın temperaturu gecə 22-26 dərəcə, gündüz 34-39 dərəcə isti olacaq. Dağlarda isə gecə 15-20 dərəcə, gündüz 23-28 dərəcə isti gözlənilir. Külək şərq istiqamətindən əsəcək.

Çimərliklər üçün xüsusi məlumat verilib. Abşeron çimərliklərində dəniz suyunun temperaturu şimal çimərliklərində (Sumqayıt, Novxanı, Pirşağı, Nardaran, Bilgəh, Zaqulba) 26-27 dərəcə, cənub çimərliklərində (Türkan, Hövsan, Sahil, Şıx) isə 27-28 dərəcə isti olacaq.