Ukrayna hücumu nəticəsində Qara dənizdə "Rosatom"a məxsus konteyner gəmisi batıb

Avqustun 1-nə keçən gecə Qara dənizdə Rusiyanın "Rosatom" Dövlət Korporasiyasının tərkibindəki FESCO şirkətinə məxsus "Yanina" konteyner gəmisi Ukrayna Silahlı Qüvvələrinin hücumuna məruz qalıb. Hadisə Novorossiyskdən 130 dəniz mili məsafədə baş verib. Bu barədə "Rosatom"un baş direktoru Aleksey Lixaçyov məlumat verib.

Lixaçyovun sözlərinə görə, hücum nəticəsində gəmi batıb. O, qeyd edib ki, sözügedən gəmi beynəlxalq sularda hərəkət edən və dondurulmuş ərzaq məhsullarından tutmuş tikinti və üzlük materiallarınadək mülki yüklər daşıyan adi mülki konteyner gəmisi olub.

Hücum zamanı gəmidə olan 17 ekipaj üzvünün hamısı xilas edilib. Lixaçyov bildirib ki, onların vəziyyəti qənaətbəxşdir.

Hadisə Ukraynanın dəniz pilotsuz aparatlarından istifadə etməklə həyata keçirilib. Bu, Qara dənizdə mülki gəmiçiliyə qarşı son dövrlərdə baş verən insidentlərdən biridir.