Sloveniya Prezidenti Nataşa Pirts Musar yol qəzasında yüngül xəsarət alıb

Sloveniya Prezidenti Nataşa Pirts Musar Xorvatiyadan məzuniyyətdən qayıdarkən yol qəzasına düşüb. Hadisə iyulun 31-də ölkənin "Kastelec" tunelində baş verib. Prezident Administrasiyasının məlumatına görə, dövlət başçısının kortejinə daxil olan iki polis avtomobili toqquşub.

Qəza zamanı Pirts Musar yüngül xəsarət alıb. O, tibbi müayinə üçün xəstəxanaya aparılıb və vəziyyətinin qənaətbəxş olması səbəbindən qısa müddət sonra evə buraxılıb. Hadisə nəticəsində karvandakı şəxslərdən biri ağır, digəri isə yüngül bədən xəsarətləri alıb.

Qəzanın dəqiq səbəbləri hələlik məlum deyil. Faktla bağlı araşdırmalara Sloveniya Xüsusi Dövlət Prokurorluğu da cəlb olunub. Hüquq-mühafizə orqanları yol-nəqliyyat hadisəsinin bütün təfərrüatlarını araşdırır.

Qeyd edək ki, prezident məzuniyyətdən paytaxta qayıdarkən hadisə baş verib. Yaralanan digər şəxslərin səhhəti ilə bağlı əlavə məlumat açıqlanmayıb.