Sevil Əliyeva: "2017-ci ildən Bakıda, ata evimdə yaşayıram"

Ümummilli Lider Heydər Əliyevin qızı, bəstəkar, "Şöhrət" ordenli Sevil Əliyeva sosial şəbəkə hesabında yeni paylaşım edib. O, paylaşımında ona ünvanlanan təbriklərə və xoş arzulara görə minnətdarlığını bildirib və hazırda Azərbaycanda yaşadığını açıqlayıb.

Sevil Əliyeva qeyd edib ki, uzun illər xaricdə yaşadığı üçün bir çox insan hələ də onun Azərbaycandan kənarda olduğunu düşünür. O, bu məsələyə aydınlıq gətirərək bildirib ki, 2017-ci ildən etibarən Bakıda, ata evində yaşayır və həyatını doğma Vətənində davam etdirir.

O, paylaşımında həmçinin ona göstərilən diqqətə, söylənilən xoş sözlərə və hiss etdiyi dəstəyə görə hər kəsə ürəkdən təşəkkür edib. Sevil Əliyeva bu səmimi münasibətin və sevginin onun üçün çox dəyərli olduğunu vurğulayıb.

Sonda o, hər kəsə möhkəm cansağlığı, firavanlıq, xoşbəxtlik və uğurlar arzulayıb. Paylaşım "Hörmətlə, sizin Sevil Əliyeva" imzası ilə tamamlanıb.