Rusiyada iki neft emalı zavoduna PUA hücumu: yanğınlar başlayıb

Avqustun 8-nə keçən gecə Ukrayna pilotsuz uçuş aparatları (PUA) ilə Rusiyanın İlski və Sızran neft emalı zavodlarına hücum edib. Hücum nəticəsində hər iki müəssisədə yanğın başlayıb. Bu barədə məlumatı RİA Novosti, Krasnodar diyarının operativ qərargahı və Samara vilayətinin qubernatoru Vyaçeslav Fedorişşev yayıb.

Krasnodar diyarının operativ qərargahının bildirdiyinə görə, İlski NEP-də PUA qalıqlarının düşməsi nəticəsində yanğın baş verib. İlkin məlumata görə, beş nəfər xəsarət alıb. Yaralılara tibbi yardım göstərilir, hadisə yerində operativ xidmətlər işləyir.

RBC-Ukrayna-nın məlumatına görə, hücum Samara vilayətindəki Sızran NEP-nə də endirilib. Zavodun ərazisində hücumdan sonra qırmızı alov və qalın qara tüstü müşahidə olunub. Samara vilayətinin qubernatoru Vyaçeslav Fedorişşev təsdiqləyib ki, vilayətin sənaye müəssisələrindən biri bu gecə Ukrayna PUA-larının hücumuna məruz qalıb.

Fedorişşev qeyd edib ki, hazırda nəticələrin aradan qaldırılması davam edir, operativ xidmətlər PUA-ların düşdüyü yerlərdə işləyir. Zərərçəkənlər barədə məlumat dəqiqləşdirilir. Hadisənin təfərrüatları və dağıntıların miqyası araşdırılır.