Rusiya Ermənistandan su və qazlı içkilərin satışını dayandırıb

Rusiyanın "Cheстный знак" markalama sisteminin operatoru olan Mərkəzi Reyestr və Təhlil Mərkəzi (ЦРПТ) Rospotrebnadzorun tapşırığı ilə Ermənistandan idxal edilən 70 mindən çox butulka içməli su və qazlı içkinin satışını bloklayıb. Bu barədə "Kommersant" nəşri məlumat yayıb.

Məhdudiyyətlərə "RRR" mineral su zavodunda istehsal olunan "BJNI" (БЖНИ) mineral içməli suyu, "VATERLOK" şirkətinin "Просто Азбука" təbii içməli suyu (uşaq suyu da daxil olmaqla) və "Arsen ev Nerses" MMC-nin DARBAS markalı alkoqolsuz mohito içkisi daxildir. Qərar istehsalçıların məhsula dair məcburi tələbləri pozması ilə əlaqədar qəbul edilib.

ЦРПТ-nin baş direktor müavini Revaz Yusupov bildirib ki, Rospotrebnadzorun göstərdiyi partiyaların satışı bütün lazımi yoxlamalar başa çatana qədər həm pərakəndə, həm də onlayn kanallarda qadağandır. O qeyd edib ki, markalama sistemi ölkədəki hər kassa ilə inteqrasiya olunub və bu, istehlakçıların müdafiəsi mexanizmini dərhal təmin etməyə imkan verir.

May ayının sonundan etibarən Rusiya Ermənistandan müxtəlif məhsulların — spirtli içkilər, tərəvəz, meyvə və güllərin tədarükünü ardıcıl olaraq qadağan edir. Rusiya hakimiyyəti bu tədbirlərin müvəqqəti olduğunu və malların təhlükəsizliyi ilə bağlı olduğunu bildirir. Ermənistan tərəfi isə məhdudiyyətləri siyasi motivli adlandırıb.