Rubio: Hörmüz boğazı ilə bağlı danışıqlarda irəliləyiş var, lakin yekun razılıq yoxdur

ABŞ dövlət katibi Marko Rubio bildirib ki, Hörmüz boğazından gəmilərin keçidi ilə bağlı İran və Omanla aparılan danışıqlarda irəliləyiş əldə olunub. Lakin o qeyd edib ki, hələlik yekun razılaşma imzalanmayıb və Vaşinqton bu istiqamətdə işlərin davam etdiyini vurğulayıb.

Rubio jurnalistlərə açıqlamasında deyib: "Bu danışıqlarda irəliləyiş əldə edilib, lakin hələ yekun qərar qəbul edilməyib. Ümid edirik ki, bu, tezliklə baş verəcək". Onun sözlərinə görə, İranla danışıqlar davam edir və yekun razılaşmanın yaxın vaxtlarda əldə olunacağı gözlənilir.

Dövlət katibi həmçinin qeyd edib ki, hazırda Hörmüz boğazından gəmilərin hərəkəti davam edir və neft daşımaları həyata keçirilir. "Boğazdan gəmilər keçir. Hazırda neft daşımaları da həyata keçirilir. Hörmüz boğazı açıqdır", - deyə Rubio əlavə edib.

Qeyd edək ki, Hörmüz boğazı dünya neft ticarəti üçün strateji əhəmiyyətə malikdir və buradan keçən neft daşımalarının həcmi qlobal enerji bazarına birbaşa təsir göstərir. Danışıqların nəticəsi beynəlxalq ictimaiyyət tərəfindən diqqətlə izlənilir.