Oman sahillərində tanker mərmi ilə vurulub

Oman sahillərində ticarət gəmisi mərmi ilə vurulub. Hadisə ölkənin şimal-şərqində, sahil xəttindən təxminən 11 kilometr aralıda baş verib. Bu barədə Böyük Britaniya Hərbi Dəniz Qüvvələri yanında fəaliyyət göstərən Dəniz Ticarət Əməliyyatları Mərkəzi (UKMTO) məlumat yayıb.

Mərkəzin bəyanatına görə, tankerə dəyən mərmi gəminin maşın bölməsinə ziyan vurub. Hadisə nəticəsində gəminin hərəkət sisteminə ciddi zədə dəydiyi bildirilir. UKMTO hadisənin Omanın Lima bölgəsindən 11 kilometr şərqdə baş verdiyini qeyd edib.

Hazırda səlahiyyətli orqanlar insidentin səbəbləri və təfərrüatları ilə bağlı araşdırma aparır. Hadisənin kim tərəfindən törədildiyi və ya mərmi növü barədə hələlik rəsmi açıqlama verilməyib.

Bu, son dövrlərdə regionda ticarət gəmilərinə qarşı baş verən növbəti hücumdur. Oman körfəzi və ətraf suları beynəlxalq neft daşımaları üçün mühüm marşrut hesab olunur.