"Nar"ın dəstəyi ilə inklüzivlik hekayələri illüstrasiyalı formatda təqdim olunur

"Nar" mobil operatorunun dəstəyi ilə həyata keçirilən "Bütün Vücudlar Danışır" sosial layihəsi çərçivəsində inklüzivlik mövzusunda maarifləndirmə işi yeni formata keçib. "DanceAbility Azerbaijan" tərəfindən icra olunan layihədə icma üzvlərinin real həyat təcrübələri illüstrasiyalı hekayələr vasitəsilə ictimaiyyətə çatdırılır. Bu yanaşma qısa mətn və aydın vizual materiallarla müxtəlif mövzuları daha əlçatan etməyi hədəfləyir.

Yeni formatda paylaşılan ilk hekayə eşitmə məhdudiyyəti olan və əmək fəaliyyətinə yeni başlayan Nərgizin həyat təcrübəsinə əsaslanır. Layihənin əsas məqsədi əlilliyi olan və olmayan şəxslərin birgə fəaliyyətini təşviq etmək, inklüziv icmanı gücləndirmək və əlillik mövzusunda ictimai məlumatlılığı artırmaqdır.

Layihə 2025-ci ilin dekabr ayından etibarən həyata keçirilir və bu müddət ərzində 238 nəfər iştirak edib. Onlardan 51 nəfəri əlilliyi olan, 187 nəfəri isə əlilliyi olmayan şəxslərdir. Layihə çərçivəsində rəqs məşğələləri, icma görüşləri, master-klaslar və digər birgə fəaliyyətlər təşkil olunur. İştirak etmək istəyənlər qeydiyyat linki və ya WhatsApp əlaqə nömrəsi vasitəsilə müraciət edə bilərlər.

"Nar" şirkəti sosial məsuliyyət strategiyası çərçivəsində inklüziv cəmiyyətin inkişafını, bərabər imkanların yaradılmasını və hər kəsin cəmiyyət həyatında fəal iştirakını dəstəklədiyini bildirir. Şirkət hazırda 2,2 milyon abunəçiyə xidmət göstərir və son 7 il ərzində Müştəri Loyallığı İndeksi göstəricisinə görə Azərbaycanda lider mobil operator olaraq qalır.