Məleykə Abbaszadə abituriyentlərə ixtisas seçimi ilə bağlı müraciət edib

Dövlət İmtahan Mərkəzinin (DİM) İdarə Heyətinin sədri Məleykə Abbaszadə ali təhsil müəssisələrinə ixtisas seçimi ilə bağlı abituriyentlərə müraciət ünvanlayıb. Müraciət sosial media hesabında yerləşdirilib və orada seçim prosesinin əhəmiyyəti vurğulanıb, gənclərə tövsiyələr verilib.

Abbaszadə qeyd edib ki, ixtisas seçimi ali təhsil yolunda ən məsuliyyətli qərarlardan biridir və bu prosesdə yalnız rəsmi, etibarlı məlumat mənbələrinə istinad etmək vacibdir. Bu məqsədlə "Abituriyent" jurnalının 4-cü nömrəsinin yaxın günlərdə nəşr olunacağı və abituriyentlərin istifadəsinə veriləcəyi bildirilib.

Jurnalda ixtisas seçimi elanı və müsabiqə şərtləri, "Abituriyentin elektron ixtisas seçimi ərizəsi"nin doldurulma qaydası, ali təhsil müəssisələrinə dövlət sifarişi ilə tələbə qəbulunun proqnozu və digər vacib məlumatlar yer alacaq. DİM sədri həmçinin jurnalda dərc olunan psixoloq tövsiyələrinin oxunmasının xüsusi əhəmiyyət daşıdığını vurğulayıb. Həmin məqalədə peşə seçimi zamanı yaranan qərarsızlığın səbəbləri izah edilir və abituriyentlərə maraq, bacarıq, dəyər və real imkanlarını qiymətləndirərək peşə xəritələrini formalaşdırmaq yolları göstərilir.

Qeyd olunub ki, jurnal həm Azərbaycan, həm də rus bölmələrinin abituriyentləri üçün vahid formada, Azərbaycan dilində hazırlanıb. Nəşrdə hər iki bölmə üzrə və birgə qəbul aparılan ixtisaslar təqdim olunur. Müraciətin sonunda Abbaszadə abituriyentlərə uğurlu və düşünülmüş ixtisas seçimi arzulayıb.