Japarov: Mərkəzi Asiya və Azərbaycan qədim şəhərlərin unikal irsini dünyaya təqdim edə bilər

Qırğızıstanın Çolpon-Ata şəhərində keçirilən "Mərkəzi Asiya – Azərbaycan" qeyri-rəsmi Məşvərət görüşündə çıxış edən Qırğızıstan Prezidenti Sadır Japarov bildirib ki, Mərkəzi Asiya və Azərbaycan dünyaya qədim şəhərlərin unikal irsini, Böyük İpək Yolunun tarixi abidələrini, dağ və göl mənzərələrini, milli ənənələri və mədəni müxtəlifliyi təqdim edə bilər. Onun sözlərinə görə, xalqlar arasında mədəni yaxınlıq, ortaq tarix və ənənəvi əlaqələr münasibətlərin möhkəm təməlini təşkil edir və turizm sahəsində əməkdaşlıq böyük potensiala malikdir.

Japarov qeyd edib ki, son illərdə Mərkəzi Asiya dövlətləri arasında əməkdaşlıq keyfiyyətcə yeni məzmun qazanıb. Dövlət sərhədləri ilə bağlı prinsipial əhəmiyyət daşıyan tarixi razılaşmalar əldə olunub. Regional əməkdaşlığın möhkəmləndirilməsinin mühüm nəticələrindən biri kimi dövlətlərin beynəlxalq arenada bir-birini qarşılıqlı dəstəkləməsini vurğulayıb. O, Qırğızıstanın 2027–2028-ci illər üzrə BMT Təhlükəsizlik Şurasına namizədliyinin dəstəklənməsinə görə minnətdarlığını ifadə edib.

Prezident Daşkənddə Mərkəzi Asiya dövlət başçılarının BMT-yə üzv dövlətlərə ünvanlanan müraciətinin qəbul edilməsini regional həmrəyliyin və ölkəsinə göstərilən mühüm dəstəyin parlaq təzahürü kimi qiymətləndirib. O bildirib ki, Qırğızıstan bu beynəlxalq platformadakı fəaliyyəti çərçivəsində regionun ümumi maraqlarını təşviq edəcək.

Japarov birgə fəaliyyətin əsas istiqamətlərindən biri kimi nəqliyyat əlaqələrinin inkişafını qeyd edib. Ölkələrin strateji əhəmiyyət daşıyan dəmir yolu, avtomobil yolu, aviasiya və multimodal layihələr həyata keçirdiyini vurğulayıb. Bu istiqamətlər arasında uzlaşmanın və qarşılıqlı tamamlayıcılığın təmin edilməsinin vacibliyini qeyd edib. İri infrastruktur layihələri sırasında Çin–Qırğızıstan–Özbəkistan dəmir yolunun tikintisinin də yer aldığını bildirib.