DünyaHörmüz boğazında neft tankeri vurulub
Hörmüz boğazında, Oman sahilləri yaxınlığında neft tankerinin vurulması hadisəsi baş verib. Bu barədə Böyük Britaniyanın Dəniz Ticarəti Əməliyyatları Mərkəzi (UKMTO) məlumat yayıb. Hadisə Omanın Lima limanından təxminən 20 kilometr şimal-şərqdə qeydə alınıb.
Zərbə tankerin mühərrik bölməsinə dəyib və nəticədə gəmi idarəetməni itirib. İlkin məlumata görə, hadisə nəticəsində xəsarət alan olmayıb. Bölgədəki sahil mühafizə qüvvələri hadisə barədə məlumatlandırılıb.
Hazırda insidentlə bağlı araşdırma aparılır. Hadisənin hansı səbəbdən baş verdiyi və tankerin kimə məxsus olduğu barədə ətraflı məlumat verilməyib.
Hörmüz boğazı dünya neft ticarəti üçün strateji əhəmiyyətli keçid yollarından biri hesab olunur. Bu regionda baş verən hər hansı insident enerji daşıyıcılarının daşınmasına təsir göstərə bilər.