Finlandiya İspaniyanın Şengen zonasından müvəqqəti çıxarılmasını təklif edib

Finlandiyanın daxili işlər naziri Mari Rantanen İspaniyanın Şengen zonasından müvəqqəti çıxarılması təklifini dəstəkləyib və bütün Avropa ölkələrini bu təşəbbüsə qoşulmağa çağırıb. Bu barədə o, sosial şəbəkə hesabında yazıb. Rantanen bildirib ki, İspaniya Şengen zonasının xarici sərhədlərinin qeyri-qanuni keçidlərdən qorunmasını təmin edə bilməyib və bu vəziyyət davam edə bilməz.

Nazirin fikrincə, xarici sərhədlərin qorunması üzrə öhdəliklərini yerinə yetirməyən ölkələr Şengen zonasının üzvü ola bilməzlər. O, İtaliyanın baş naziri Corcia Meloninin əvvəlki çağırışını xatırladaraq, bütün Avropa dövlətlərini bu təklifi dəstəkləməyə səsləyib.

Qeyd edək ki, bundan əvvəl İtaliyanın baş naziri Corcia Meloni ölkəsinin sərhədlərin və vətəndaşların təhlükəsizliyini qorumaq üçün fövqəladə tədbirlər görməyə hazır olduğunu, o cümlədən İspaniya ilə Şengen razılaşmasının dayandırılmasını nəzərdə tutan addımlar atacağını bəyan etmişdi.

Müzakirələr Mərakeşdən gələn qeyri-qanuni miqrant axını fonunda baş verir. Bu vəziyyət Avropa İttifaqının cənub sərhədlərində miqrasiya təzyiqini artırır və bir sıra üzv ölkələrin narazılığına səbəb olur. İspaniya hakimiyyəti hələlik bu ittihamlara rəsmi reaksiya verməyib.