Ermənistanda Tsarukyanın konyak zavodu dövlət nəzarətinə keçib

Ermənistanın Baş Prokurorluğunun məlumatına görə, "Ararat Noy" Yerevan konyak-şərab-araq kombinatının səhmləri Antikorrupsiya Məhkəməsinin qərarı ilə dövlət idarəçiliyinə və mühafizəsinə verilib. Bu, qanunsuz mənşəli əmlakın müsadirəsi prosesi çərçivəsində həyata keçirilib.

Məhkəmə müvafiq qərarı iyulun 30-da qəbul edib. Şirkətin səhmlərinin idarə edilməsi və saxlanması Ermənistan Respublikasına, İqtisadiyyat Nazirliyinin vasitəsilə həvalə olunub. İddia isə bir gün əvvəl, iyulun 29-da verilib.

Söhbət Ermənistanın keçmiş deputatı və "Çiçəklənən Ermənistan" müxalifət partiyasının lideri Qagik Tsarukyana məxsus olan müəssisədən gedir. O, əvvəllər iki ay müddətinə həbs edilib.

Qeyd edək ki, bundan əvvəl də Ermənistan hakimiyyəti Tsarukyandan "Araratssement" zavodunu və Multi Wellness Center idman kompleksini müsadirə edib. Bu addımlar ölkədə qanunsuz mənşəli əmlakın müsadirəsi ilə bağlı aparılan geniş kampaniyanın tərkib hissəsidir.