Bakıda piyadalar üçün profilaktik tədbir keçirilib

Səbail Rayon Polis İdarəsinin Dövlət Yol Polisi Şöbəsinin əməkdaşları piyadaların təhlükəsizliyinin təmin edilməsi məqsədilə növbəti profilaktik tədbir həyata keçiriblər. Daxili İşlər Nazirliyinin mətbuat xidmətindən verilən məlumata görə, tədbir Şıx çimərliyi ətrafında, Bayraq Meydanı yaxınlığında və 20-ci Sahə yaşayış massivində baş tutub. Əsas məqsəd piyadaların məsuliyyətini artırmaq və onların iştirakı ilə baş verə biləcək yol-nəqliyyat hadisələrinin qarşısını almaqdır.

Tədbir zamanı yaxınlıqda yerüstü və yeraltı piyada keçidləri mövcud olduğu halda onlardan istifadə etməyən, intensiv hərəkət edən yollarda hərəkət etməklə həm özlərinin, həm də digər hərəkət iştirakçılarının həyat və sağlamlığı üçün təhlükə yaradan piyadalar müəyyən edilərək saxlanılıblar. Onlarla maarifləndirici söhbətlər aparılıb, yol hərəkəti qaydalarına əməl etməyin vacibliyi və bunun insan həyatının qorunmasındakı rolu barədə ətraflı məlumat verilib.

Polis əməkdaşları piyadalara izah ediblər ki, piyada keçidlərindən istifadə etmək həm onların öz təhlükəsizliyi, həm də ümumi yol hərəkəti təhlükəsizliyi üçün mühüm əhəmiyyət kəsb edir. Qaydalara əməl edilməməsi ağır nəticələrə səbəb ola bilər.

Bildirilib ki, bu istiqamətdə profilaktik tədbirlər ölkə ərazisində davam etdirilir. Daxili İşlər Nazirliyi yol hərəkəti iştirakçılarını qaydalara riayət etməyə çağırır.