135 saylı marşrutun avtobusları CNG texnologiyalı yeni nəqliyyat vasitələri ilə əvəz olunur

Avqustun 1-dən etibarən Xırdalan şəhərini metronun "Memar Əcəmi" stansiyası ilə birləşdirən 135 nömrəli müntəzəm marşrut xəttində istismar olunan dizel mühərrikli avtobuslar tədricən yeniləri ilə əvəz ediləcək. Bu barədə Rəqəmsal İnkişaf və Nəqliyyat Nazirliyi yanında Azərbaycan Yerüstü Nəqliyyat Agentliyi (AYNA) məlumat yayıb.

Yeni avtobuslar CNG (sıxılmış təbii qaz) texnologiyası ilə təchiz edilən böyüktutumlu "Iveco" markalı nəqliyyat vasitələridir. Bu dəyişiklik sərnişindaşıma xidmətinin keyfiyyətinin artırılması məqsədi daşıyır və marşrutu idarə edən "Xaliq Faiqoğlu" şirkəti tərəfindən həyata keçirilir.

Yeni avtobuslarda ödəniş yalnız nağdsız qaydada həyata keçiriləcək. Gediş haqqı 0,60 manat müəyyən edilib ki, bu da əvvəlki tariflə müqayisədə dəyişməz qalır.

Dəyişiklik həm ekoloji göstəricilərin yaxşılaşdırılmasına, həm də sərnişinlərə daha rahat və müasir nəqliyyat vasitələrində xidmət göstərilməsinə şərait yaradacaq.